日本乜都有得租 狗都唔例外？

東京人日日忙到飛起，成日OT，加上好多都是單身在大城市打拼，難免會覺得孤單。所以有時放工都會好想有小動物陪吓自己，治癒下心靈。不過講起養寵物，始終都是一世的責任，日本人工作時間長，無咩空間照顧到。 但日本人向來創意無限，最近於網上見到一間位於代代木的寵物店，竟然可以「租狗」行公園！咁我地當然要去實測下啦～ 原來代代木公園旁邊有間叫「Dog Heart from Aquamarine」的寵物店，係東京人同遊客都會去嘅熱門spot。在這裡可以租隻狗出去散步（Dog Walk）或者留是店入面同狗狗玩（Dog Petting）。收費方面，散步一個鐘大約3,000至3,600日圓，半個鐘的店內互動體驗就950日圓左右。店鋪隔離就係代代木公園，超方便，仲可以邊行邊睇靚景。 店內有唔同品種嘅狗狗，例如Golden Retriever、Beagle、Toy Poodle、Cavalier King Charles Spaniel、Boston Terrier、French Bulldog。我哋租咗隻比高妹妹Maria，只有一歲半。比高本身就係活潑又醒目的狗種，需要好多活動量，如果成日困喺屋企一定會拆屋。但Maria出奇地溫馴，抱上手好冷靜，仲好中意人抱。店員交狗嗰陣仲會畀埋一袋裝備，有便便袋、裝便便袋嘅盒、水樽、水兜，我哋仲可以比多200日圓買一小袋零食。 出發去公園散步啦，代代木公園本身就有一個好出名嘅Dog Run（狗狗公園），分咗小型犬、中型犬同大型犬區。公園其他地方就有廣播提示大家唔好放狗自由跑，以免影響其他人。 成個散步過程Maria都好乖，無搶繩、無扭計、無吠，真係好有日本狗嘅「禮貌」feel。佢個樣又靚，行到邊都咁吸睛。雖然佢明顯聽唔明英文指令，但見到零食就即刻識坐低等食，真係萌到爆！