湯沢高原 纜車直達山頂 親子雪遊首選

講下交通先，東京搭上越新幹線，約70分鐘就到越後湯澤站，出閘行過溫泉街8分鐘就直達雪場門口。想自駕都得，經關越道「湯澤IC」出口，再開3分鐘就到停車場，完全唔使煩。

湯澤高原最正就是擁有全球最大嘅Gondola，一次可以載166人，超豪；7分鐘就直達1,000米高山頂，山頂景觀震撼到不得了，360度俯瞰銀白色雪山及溫泉街，冬日仙境即刻打卡。

雪道方面，場內有8條雪道，面積約50公頃；難度分佈以初級為主（約50%），中級約20%，高級約30%，新手或小朋友練轉彎一流，高級玩家都玩得過癮。最大斜度28度，最長滑行距離達5,000米，粉雪又幼又滑，「魚沼粉」真係名不虛傳。

未坐Gondola正式登山前，山腳有幾條平緩雪道，十分適合初學者。家庭遊，完全不滑雪都不會悶：有親子雪上樂園，可以玩雪橇、Snow racer及水泡圈，新手小朋友Chill足一日。

若持有三山互通券，更可以經GALA湯沢，再行過隔離的石打丸，就會見到The Veranda圓頂透明帳篷，大歎Glamping賞雪，邊飲熱朱古力邊賞雪景，打卡呃Like必去！玩完仲可以撘免費巴士去隔離GALA湯澤浸溫泉，焗桑拿。

飲食方面，PalPal美食廣場有4間餐廳與咖啡店，拉麵、和牛飯、甜品、咖啡應有盡有，滑完雪都可祭下五藏廟。小篇幫襯左位於山頂站旁的意大利餐廳Alpina，特色是用柴火燒烤的石窯烤爐，烤出來的pizza外皮酥脆，中間濕潤有彈性，好味到震。餐廳內裝修以原木色為主，環境溫馨舒適，落地大窗可以俯瞰美麗雪景，而且價錢唔算貴。

票價方面，大人全日券5,800日元，半日券約4,900日元。旺季記得提早半年預訂酒店，持JR東日本周遊券搭新幹線最抵，出發前可以下載「雪日本」APP睇睇雪況。

總括來說，湯澤高原滑雪場真是集「極近車站、超呃Like纜車、全方位雪玩體驗」於一身，如果身在東京想即日衝雪，湯沢一定係首選！冬天唔好錯過呀，衝呀！